الخميس، 29 نوفمبر 2012

التدوين الأسبوعى والهمّ اليومى ..



لأسبوع مر سريعاً جداً .. أسرع من أدراكى بالوقت مرات ومرات.

-خائفة جدا جدا جدا على مصر .. رأيت يوم اثلاثاء مظاهرات المعارضين فى المنيا ، وهفت على روحى بالوطنية والحب. واليوم رأيت مظاهرات المؤيدين بالسلاح !! ... مرعبة. كلما تخيلت المواجهة والاشتباك بين "الشعبين" أدعو الله أن يقبض روحى قبل أن أرى هذا المشهد فى مصر .. لأنى ساعتها سأموت بحسرتى.

-رغم أنى اجلس فى مركب ثابت على النيل ليس أقل من 3 مرات اسبوعياً -بحكم ظروف عمل- وفى فترات زمنية منتوعة من اليوم ... إلا أنى اليوم كأنى ارى النيل والسماء والجبل والجزيرة لأول مرة ... جمال وفرح وألوان .. مشاعر نفذت إلى أعماقى وخرجت مع زفيرى بالامنتنان والحب لله.

-أشارك فى ورشة "سيكو دراما" وغدا أخر يوم ... اليوم كان يوم فاصل فى حياتى "الإنسانية" بسبب هذة الورشة .. أعمق لحظات فى حياة الإنسان هى تلك التى يتلامس فيها مع ال"سلك المكشوف" فى حياة بشر آخرين.

-الاستفزاز فى الحياة هو عدو الحياة الأول .. هو معلقة الملح الغلط فى فنجان القهوة المظبوط.

-النهاردة فى تمرين من تمارين السيكو دراما كان مطلوب من كل واحد يقول لنفسه جملة واحدة بس .. اخترت أنى أقول لنفسى "الحياة قصيرة" .. بعدها حسيت براحة عظيمة ! .. كأنى أعدت اكتشاف سر الكون.

-الخوف مش ضد الاطمئنان ، والحزن العميق مش ضد الفرح الكبير ، والصدق مش ضد الخزلان ، الضعف والاستسلام مش ضد حب الحياة ... بقول كدة مش عن فلسفة لكن عن تجربة ، دلوقتى فىّ كل دا مع بعضه.

-الجيل دا الله يكون فى عونه !

-محاولات الفهم مش صعبة .. بس متعبة.

-لما تاخد قرار وماحدش يفهمك ، أو كل الناس تغلطك دا مش معناه أن القرار وحش .. المهم القرار يبقى مدروس صح ومعاه راحة .. بس!

-أنا تعبانة. مصدعة على طول وماعنديش شهية وشعرى بيقع وعندى اضطرابات نوم ... بس مش خايفة بالمعنى اللى واصل للناس واللى بتطمنى أن ربنا موجود وكدة .. ومش زعلانة اللى هو لأماتزعليش اضحكى بقى .. لأنى بضحك من قلبى مش بمثل ! ... أنا تعابة لأنى فى مرحلة انى بفهم وبخاف .. حقى.

هناك 6 تعليقات:

  1. صباح الغاردينيا كاندي
    كل اللي بيحصل في مصر دلوقتي مؤلم بس مش ليكو بس كـ مصريين لكل انسان زار مصر في يوم وحبها وحب أهلها اللي بيحصل لك دلوقتي دا لانك تعبانة نفسياً عاوزاكي تكوني أقوى وأوعي انتي وكل مصري تفقدو الامل في مصر مصر محتاجة منكم ثقة بيها وبآمنها وبإذن الله بكرة تفرج ،"
    اللهم إني أستودعتك مصر وأمنها وأمانها ونيلها وترابها وشعبها أنت خير الحافظين "
    ؛؛
    ؛
    لروحك عبق الغاردينيا
    كانت هنا
    Reemaas

    ردحذف
    الردود
    1. شكرا ياريماس ..

      اللى بتعمليه دا أحسن حاجة فى الدنيا .. أنك تدعى لمصر.
      عهدى دايماً أن ربنا مابيخذلش الحب .. فياريت كل اللى برة وهو جوة مصر وبيحبها بجد مايبطلش يدعيلها ...

      :*

      حذف
  2. بصي يا كارول صلي ع النبي :) النبي بتاعكم يا ستي اللي هو بتاعنا برضو على رأي فاتيما :)
    إنتِ عندك نفس أعراضي بالظبط..أرق و إرهاق و صداع و تساقط للشعر و للراحه النفسيه تدريجياً..
    بس الفرق بينا إني تقرباً عارفه الأسباب
    مش كل المرادفات و الأضداد اللي درسناها و كبرنا عليها صح..إنتِ قلتِ حاجه أنا فعلاً حاسه بيها أوي..إكتشفت الفتره اللي فاتت إن في مرادفات أخرى لكل قيمه و معنى..و جميل إنك بتحاولي تفهمي من بدري.
    مش عايزه أقولك إصبري و تفاءلي و الجاي إن شاء الله..ممكن..يعني..يكون أحسن
    بس عايزه أقولك إن إشتراكك في ورشة السيكو دراما و وجود أهلك و أصدقاء جنبك بتحبيهم و يحبوكي و النيــــل :) كل دول كفايه إنهم يكونوا دافع ليكِ إن الحياه فيها حاجات جميله أوي و حاجات أجمل لسه معيشناهاش..حتى لو الحياه قصيره..المهم القدره على الإستمتاع بالنعم مش مدة إستمتاعنا بيها.
    أنا مبعرفش أتفلسف..مبيلقش عليه :)
    بس بجد عايزاكي سعيده و بخير يا أجمل شمعه

    في إنتظار تدوينه جديده بروح أفضل
    :)

    ردحذف
    الردود
    1. ياشيرين على فكرة ردك فرق معايا على المستوى الشخصى وقريته كذا مرة فى كذا يوم ..
      شاكرة ربنا طبعاً على كل النعم العظيمة دى .. بس برضه قلقانه على مصر !

      ربنا يريح ويطمن قلبك ويتبقى أحسن ، ومهما كانت الأسباب تبقى أقوى منها.

      شكرا أنك ماقولتليش .. إيه اللى بتقوليه دا من فات قديمه تاه ، لكن بتشجيعنى أنى أخرج من الموروثات .. ودى حاجة نادرة لو تعلمين ;)

      ميرسى :* <3

      حذف
  3. ملعقة الملح وسط فنجال القهوة المضبوط
    ومحاولات الفهم التي لم تعد صعبة بل مُتعبة
    من أجمل ما قرأت وسط هذا المقال
    كنقاط فلسفية مُضيئة وسط الظلام

    ردحذف
    الردود
    1. شكرا يابشمهندس ..

      هاعتبر التعليق مدح فى النقط مش ذم فى المقال :)

      تعليقاتك بتفرحنى دايما :)

      حذف