السبت، 7 نوفمبر 2009

مــاتــصــدقــنــيــش!


نصيحة...
بقولهالك فى سرى ،وأتمنى ماتسمعنيش...
ماتصدقنيش!...

هاتقولى "بحبك"...
هاقولك "ماتقولهاش"...
"مش عايزة اسمعها كلام"...
"وإيه لزمتها طالما ماحستهاش"...
بس أنا مش عايزة اسمع غيرها...
هى دى حياتى من أولها لأخرها...
فأوعى تسمع كلامى وماتسمعهاليش...
ماتصدقنيش...

تسألنى خايفة؟...
هارد قبل ما تخلص سؤالك...
"عمرى ما حسيت بخوف"...
وأنا بستنى أشوف...
لمحة آمان فى نظرة...
وعمرى مابنسهالك...
فبلاش تبخل عليّ بأمانك...
وإن شفت إيدى بتترعش...
ضمنى قوى وماتطنشنيش...
وماتصدقنيش...

هاكلمك عن طموحاتى...
حاجات كتير فوق قدراتى...
دى بس احلام بتسلينى...
وبتخلينى...
أعمل لمستقبلى تحابيش...
مع إن كل آمالى كوخ...
صوت الغنا فيه ماينتهيش...
فماتصدقنيش...

هاشكيلك من صحباتى...
واوعد بقطع علاقاتى...
وهاقول عليهم كلام وحش مايتحكيش...
بحذرك....ماتهدينيش...
سبنى أقول كل اللى عندى...
آخرى دموع وكلام...
لغير كدة قلبى مابيجبنيش...
وأوعى تجارينى وتقول عليهم حرف...
بحبهم أكتر من نفسى...
وكل تهديداتى هاتنزل على مافيش...
فماتصدقنيش...

حاجات كتير على دا المنوال...
سواء كلام....نظرات....أفعال...
هبان كأنى جدّ جدا...
والجدّ صفة مابتتشريش...
لكن فى دمى...
إنى أقول كلام كتير أنا ماقصدوش...
وهزارى من قرارى خليط ماتفرقوش...
هاتقولى طب ليه كل الغلب ده...
وإزاى اعيش بحل أنا ألغاز كدة...
هاقولك ماتستجوبنيش...
ولو جاوبتك ماتصدقنيش...
مش عارفة ليه؟...
والمفروض أنك ماستمعتنيش...
أو عارفة...
وأنت سمعت...
لكن بكل صدق بقولك...
ماتصدقنيش...