الثلاثاء، 5 يونيو، 2012

نار ومَيّة


عارف رموز الرومانسية ؟
أهم حاجتين ؟
نار وميّة
النار لهب شمعة
والمية دمعة حنيّة.
خدت بالك قبل كدة
أن الدمعة ولهب الشمعة
ليهم نفس الشكل ؟
مع أن الأتنين فى الأصل مايتمسكوش
وإذا حبيت تشكلهم بمزاجك مايتشكلوش.
خدت بالك قبل كدة
إن الصيف والشتا
نار وميّة ؟
الشتا بتنزل مية من السما
يقوم الإنسان ع الأرض يرد على بردها
ويولّع نار يدفّى

والصيف السما بتبعت نار فى الأشعة
يقوم الإنسان ع الأرض يرد على حرّها
ويطشّ فى ميّة.
خدت بالك قبل كدة أن الزرع
ميّة ونار ؟
كل أكلُه ميّة ونار
يتروى ميّة ويمتص ضوء النهار
ويطلع بالممالك بدع
كل البدع دى أصلها ميّة ونار.
خدت بالك قبل كدة
أنك أنت ميّة ونار ؟
أغلب جسمك أصله ميّة
وحياتك من طاقتك
وطاقتك من الاحتراق ف رئتك
والأحتراق يعنى نار.
خدت بالك أن حياتك
أن مشاعرك
أن كلامك
دايماً يبقوا يا ميّة يا نار ؟
نار الفُرقة ، وميّة لُقى تروى بعد غياب
نار الحُرقة ، وميّة رضا تطفى بعد عذاب
نار النقد والتجريح ، وميّة حب صريح وكلام إعجاب.
خدت بالك قبل كدة
أن الميّة والنار
شفافين ؟
يا كثيف ...
أتعلم تبطّل تحتكر الضوء
بطّل أنانية بأنك تبقى أخر محطة للبصر.
خدت بالك قبل كدة
أن الدمار ع الأرض برضه يامية يانار
الطوفان مية
والفيضان والسيل والمَدّ
والبركان نار
والحريق والجفاف والقنابل والرصاص.
خدت بالك قبل كدة
أن الحرب ع الأرض
دايماً سببها يا مية يا نار
المية عشان الناس والزرع يعيشوا
والنار طاقة وبترول وحركة وحياة للآلات.
خدت بالك قبل كدة
أن الأرض كوكب ، الأرض فيه أقلية ؟
والأغلبية مَيّة بنسبة سبعين فى الميّة ؟
وأن الشمس الشداه ليها شعلة نار ؟
كل نجوم الكون ف الأصل نار من نار.
خدت بالك قبل كدة
أن الشمس والقمر
بيكلموا البحر .. بلغة النار والمية ؟
الشمس تبخر المية وتكوّن سحب
وترجعها تانى ليه
والقمر يشد الموج ويمِدّ مساحات ع الحضر
وبالجذر يلمها تانى عليه.
خدت بالك قبل كدة
أن المية والنار
حاجات بسيطة ؟
من بساطتها ماتعرفش هى إيه وليه ؟
خدت بالك قبل كدة
أن المية والنار
حاجات متوفرة متشعبة
من زلطتين .. وشمعة من شمعة .. وشعلة أوليمب تلف العالم
ومن محيط .. ونهر من بحيرة .. وبحيرة من بحر
وبحيرة وبحر من المطرة .. ووردة تشرب من على حافة قناية.
خدت بالك قبل كدة
أن المية والنار
بيمحوا بعض ؟
المية تقدر تطفى النار
والنار تقدر تجفف م المية تماماً.
خدت بالك قبل كدة
أن المية والنار
هما الحياة فى أخر سطر فى تحليلها ؟
وأن الحياة سهلة وصعبة ؟
وليها شفافية ع الأبدية لولا التلوث ؟
وأن المية والنار بيطهروا وينضفوا ؟
وإن زادوا بيغرّقوا ويحرقوا ؟
وإن عشاك وغداك حلّة مية على عين نار
وفيها أى حاجة بتستوى ؟
وأن أنت مية ونار
بتكوى و تتكوى
وتروى وترتوى?

هناك 6 تعليقات:

  1. مساء الغاردينيا كاندي
    أجدتي الوصف يارائعة وكم من لهيب ونار
    يجتمعان بـ إحساس واحد حتى في الحب
    نشعر ببرودته على صدورنا سلماً وراحة
    ونشعر بجذوة الشوق تشعل نار الغرام "
    ؛؛
    ؛
    مبدعة
    لروحك عبق الغاردينيا
    كانت هنا
    REEMAAS

    ردحذف
  2. لاأجد ما أقوله يا مبدعةغير الله الله الله الله عليكي وعلى اسلوبك الحاكي الراقي الممتع البعيد المنال القريب الفهم ..تحياتي لكي ولبابا

    ردحذف
  3. Piece of Art
    روعة بجد
    الفكرة نفسها مُبتكرة وجديدة
    والإسترسال فيها فاجئني كمان
    حقيقة مش مُجاملة
    أبدعتِ

    ردحذف
  4. الحقيقة يا جماعة مش عارفة اقولكم إيه غير بجد ربنا مايرحمنى منكم وبجد أنا مبسوطة :)

    أصلا البتاعة دى كتبتها ليلة امتحان مادة أفران .. كلها مية ونار وكنت مخنوقة جدا ، وحاسة أصلا أنها حاجة عبيطة ومالهاش معنى .. ونشرها علشان ألمّ تعليقات التريقة ... ماكنتش متوقعة التشجيع دا !


    ريماس ...

    أنتى أدرى بموضوع الحب دا ;)
    فعلا الحب أحيانا بيبقى جواه خوف ع الحبيب وشوق مع راحة القلب ...
    ربنا يدفى قلبك بالحب .. ويطرى عليه بالمية :)
    وميرسى لكومنتك


    ماما زيزي
    :*)
    كومنتك هو اللى رائع وراقى وكتير علىّ

    وعلى فكرة انا مانستش موضوع المنيا .. بس أنا لدوقتى فى زنقة الامتحانات ، وأعتقد ظروف البلد مش هاتسمح لو فكرت فى حاجة زى كدة دلوقتى ..
    بس موضوع ف دماغى جدااااااااااااا ونفسى يحصل.


    بشمهندس أحمد

    Piece of Art حتة واحدة ! ومن مين ؟؟ :)
    كومنت حضرتك بجد أسعدنى .. وشجعنى فى وقت أنا فى أمس الحاجة فيه لتشجيع ..

    ميرسى :)

    ردحذف
  5. الفكرة جديدة جدا
    و تأمل في الحياة و نظرة عميقة لزاوية لم انتبه لها قبلا
    أعجبني تحليلك المميز :)

    ردحذف
  6. شكرا كارول ،

    بيسعدنى حضورك :)

    ردحذف